انت الترياق

البارت الاول من انت_الترياق 
_ ايه ابنه انتى بتقولى يا ماما 
زى ما سمعتى ويلا جهزى نفسك عشان جايين بليل
_لا انتى اكيد بتهزرى يا ماما بقى بعد ده كله وبعد ما اتعلمت اتجوز واحد أرمل ومعاه ولد ليه ولا معنسه
بت انتى انتى واحده مكانك بعد ما رفضت العرسان دول كلهم متتكلمش ولا نسمع صوتها والمرة دى مفيش رفض هتتجوزيه ورجلك فوق رقبتك 
لا ده إجبار وقهر كمان واديكى قولتيها العرسان دول كلهم يعنى انا مش بايرة ولا قطر الجواز فاتنى عشان ترمونى الرميه دى ويا ترى بقى بيت عيله وامه واخواته موجودين قولى متتكسفيش ما ده الى ناقص بترمونى بترمونيي يا أهلى ياللى مليش غيركم 

بسسس يا بت وطى صووتك وايه الكلام الاهبل ده نرميكى ايه وامه ايه وبيت عيله ايه ما انتى متعرفيش مين متقدملك لو تعرفى مش هتفتحى بوقك انا مش عارفه هو بصلك على ايه اصلا على لسانك الى بينقط درر ولا على زورك وصوتك الى بيسمع الجيران ولا كأننا مربين بقرة فى البيت يلا يا بت بلاش لكاعه البسي حاجه زى الناس وظبطى نفسك عشان الناس اما تيجى بليل خلصى
_مش لابسه هااا وهطفشوا زى الى قبله وابقوا اتكلموا 
مهو ده بالذات لازم يطفش انا مش مطلقه ولا بايرة عشان ترمونى الرميه دى ها وخليه يعتب هنا ...ماشى خلينى اشوف وشه بس اكيد واحد من جمبنا من هنا ومعفن قال ابنه قال ليييه هيتجوز شغاله 
بليل
_يلا يا بت الناس جت برة قومى تعالى 
مش عايزة اطلع مش عااايزة خليهم يمشوا 
_يمشوا مين يا بنت الموكوسه ده انا ما صدقت 
ااه ما صدقتى عايزة تخلصى منى بس ده لا يمكن يحصل هفضل قاعده كده على قلبكم 
_ايه يا ام غزل مجيتوش ليه 
تعالى شوف بنتك مش راضيه تقوم معايا 
_فيه ايه يا بنتى قومى الناس قاعده بره عيب عليكى عايزاهم يقولوا علينا ايه 
يعنى ده يرضيك يا بابا أرمل ومعاه ولد انتم ناسيين ان دى هتبقى أول فرحتى 
_يا حبيبتي كل شيء قسمه ونصيب وطلاما ده نصيبك منقدرش نقول لا 
ومين قال ان ده نصيبى ما يمكن لا مين عارف 
_لو مش نصيبك مش هغصبك ولو مش عجبك برضه مش هغصبك صدقينى بس اطلعى اقعدى معاهم دول ضيوف مينفعش كده 
حاضر يا بابا عشان خاطرك بس هطلع بس لو فعلا معجبنيش انتم مش هتجبرونى صح 
_صح يا حبيبتي يلا تعالى معايا 
خرجت مع بابا وانا ماسكه فى ايده وخاېفه مش عارفه ليه كأنها أول مرة عريس يتقدملى وأطلع اشوفه كنت متوترة وباصه فى الارض خاېفه اشوفه 
دخلنا وبابا قعد وانا قعدت جمبه وانا بفرك فى ايدى من التوتر وبفكر فى اى حاجه تانيه عشان مقلقلش وبتمنى الليله دى تخلص بسرعه فوقت على صوت بابا وهو بيقول نسيبهم مع بعض شويه يتكلموا فجأه الدنيا ضلمت ومسكت فى ايد بابا وكأنى بقوله متسبنيش طبطب على ايدى وخرج وانا فضلت حاطه راسى فى الارضيه متوتره اكتر انا مش عارفه لسانى راح فين بجد معقوله دى انا 
فوقت على صوته 
حتفضلى باصه فى السجادة كتير أظن انتى حافظاها فمش لازم تتأملى فيها كتير 
ايه ده صوته حساه صارم اوى كده ليه ابتدينا بقى
رفعت راسى وانا ببصله بغيظ من كلامه ...ايه ده ايه القمر ده احم لا مش لدرجه قمر يعنى ده قمرين ملامحه حاده شويه وعيونه عسلى وابيضانى وجسمه شكله متناسف بالبدله الى كان لابسها شكله بيروح جيم وبيلعب رياضه احم شيلت عينى عنه